ثورة بركان

أمين 2015:

قام امين ضرب الكرسي برجله
هيام:اقعد بس هتفرج علينا الناس,
أمين وهو ماشي:ماعدتش تفرق.
مشي امين وساب هيام قاعده وحيده علي كرسي بلاستيك امام عربية عم شطه اول عربية حلبسه اشتغلت جنب بركان 2010 المكان اللي شهد علي بداية حب امين وهيام.

كمان جايه تقوللي انها وافقت علي العريس!!انا كنت فاكرها ندمانه علي انها قبلت من الأساس تشوف العريس الجابته ليها دينا صاحبتها!كنت مستنيها تطلب اسامحها علي جرحها لييه لما شفتها قاعده معاه هو ودينا في "فولكانو كوفي شوب"معقول قدرتي تقابليه جنب بركان حبنا.معقوله تسيبني عشان واحد اسمه شهاب !!

عريس ماتعرفيهوش وكل العجبك فيه انه نجح يكون نفسه في شهور !

هيام 2010 "منطقه شعبيه:

هيام:لا يا ماما مش هاخد كيس الزباله معايا انا رايحه درس في بيت دينا اشيك بنت في الدفعه عاوزاني اروح ريحتي زباله!!

ام هيام:يابنتي الزبال بقالو اسبوع مجاش,هنعفن يعني؟؟هي الماتتسماش انفلونزا الخنازير اللي كرهت الزبالين في الشغل كانوا بيجوا يومين ويغيبوا يومين دلوقتي بطلوا خالص لما الحكومه اعدمت الخنازير وخلتهم يربوا معيز,بس المعيز مابتكلش زباله ياحيلت امك,خدي الكيس في طريقك ارميه في البركان وبعدين اطلعي علي الدرس.
دي مش اول مره اروح البركان بس اول مره اشوفه,شاب اسمر طويل ضحكته ماليه المكان عمال يلف وسط الحبيبه الواقفين علي كورنيش البركان بيكتب اسم كل حبيب وحبيبته بتراب البركان جوه ازازه صغيره زكرى تعيش معاهم العمر كله ب 5 جنيه ولو الحبيب غلبان "كالعاده" بياخد 2 جنيه بس.
حسيت انه مش انسان عادي,زكي,فنان وكمان شكله حلو.وده خلاني احاول استثمر الفرصه و اروح له "طبعا بعد مارميت كيس الزباله في البركان"
هيام:مسا الخير,عاوزه اعرف اسمي يكون أحلا لو اتكتب في ازازه بالعربي ولا بالأنجلش؟
• اسمك ايه؟
• هيام
• بالعربي هيكون حلو اوي ,هكتبلك حرف ( م ) مشفتيش زيه ,تحبي اكتبلك اسمك؟
رفضت بحجةاني مستعجله والحقيقه اني مكنتش عاوزه اسمي يتكتب وحيد في الازازه و قبل مامشي اخدت نمرة موبيل الشاب عشان لو احتجت منه شغل وفهمته اني هجيبله زباين.
بعد يومين من المكالمات المكثفه كتبلي اسمي في اجمل ازازه عنده و اجمل حاجه ان اسمي ماكنش وحيد كتب اسمه جنب اسمي " هيام & امين " و كانت اول هديه في حبنا

دينا 2015:
دينا:طبعا يابنتي دادي ممكن يساعده,هو خريج ايه؟
هيام:أمين مخلص فنون من سنتين
دينا:عنده خبره ؟
هيام؟من ساعتها مشتغلش شغلانه بجد موراهوش غير الرسم وجو الفنانين ده وسارح بيكتب اسامي بالتراب البركاني او ينقش قلوب علي الصخور البركانيه,انا يادينا هديله اخر فرصه معايه يا اما يشتغل زي الناس يا اما كل واحد يشوف نصيبه.
دينا:هو عنده كام سنه؟اقولك,هشوفلك دادي لو كان فاضي وتحكيله انتي الحكايه مره واحده بس بقولك ايه 3 دقائق بالكتير ماتكتريش فالكلام.
ابو دينا:اهلا يابنتي
هيام:انا يا دكتور مش هعطل حضرتك هو موضوع واحد قريبي لو ممكن حضرتك تساعده يلاقي شغل مناسب.
ابو دينا:هيام يابنتي مينفعش الشباب يبتدي حياته معتمد علي الواسطه,انا مثلا فضلت 15 سنه قبل ماكون وزير رافض اني اتمحلس لزيد او لعبيد عشان انضم للتشكيل الوزاري مع اني كنت استحق لغاية مافرضت نفسي علي الساحه بمجهودي وبمشروعي القومي سنة 2010 لما اقترحت تحويل الصرف الصحي من البحر الي البركان وساعتها عرف المسؤلين قيمة عقلي ومجهودي مش قيمة واسطتي,
ابو دينا:انصحي قريبك يتحول من الاتكال الي الاجتهاد,فرصه سعيده يا بنتي,وصللي صاحبتك يا دينا.
ولم تستطيع هيام خلق اخر فرصه لأمين.

شهاب 2015:

شهاب:بي شور يا هيام ماحدش في الدنيا ده هيحبك قدي
هيام بدلع:بجد بتحبني يا شهاب!؟
شهاب:هيام انتي الوحيده الخلتيني اقرر اتجوز بعد ماكنت رافض تماما وبعد ماشفت عرايس ملكات جمال ولا فكرت فيهم
هيام:طب قولي بصراحه انا مختلفه في ايه عنهم؟!
شهاب:انا مش هقولك الكلام المحفوظ عن جمالك و اخلاقك لكن بجد انتي زكيه جدا بتقدري تستوعبي كل حاجه و كل حد.
هيام بدلع:يعني انا مش جميله زي ملكات الجمال بتوعك!
شهاب:مافيش واحده بزكائك ده مش حلوه.انتي فارقه عنهم ان تأثير جمالك اقوي بكتير,طب انتي ايه الي شدك فيه؟
هيام:عجبني قوي انك عارف اللي أنت عاوزه وبتعرف توصلله,فكرتك الهايله في تسويق رماد البركان البيعالج أمراض المفاصل والشيخوخه و نجاحك في مشروعك ده في وقت قصير و انك خليت الرماد البركاني حاجه اساسيه في كل بيت غني كان او فقير
شهاب:بحبك قوي
هيام:بحبك قوي
بعد ما اتفقوا علي ميعاد بكره لشراء الشبكه,رجع شهاب علي بلده الريفي يتابع مصنعه ويشرف علي العمال اللي بينقلوا التراب من الأرض الي علب فاخره مكتوب عليها الرماد البركاني الشافي.

البركان 2015:
انا هفضل ساكت لغاية امتي!!!!
من سنة 2010 يوم ما اتولدت في ام الدنيا و انا الدنيا ملطشه مع امي!
بقيت هوزؤ وسط البراكين!
اتمليت زباله وكلاب ميته وكمان مجاري لما خلاص اتسدت نفسي.
بركان ايسلندا اللي اتولد معايا وقف العالم كه قدام دخانه,اشمعني انا اللي كل ماأغلي و اطلع دخان جامد فحت الاقيه مش باين وسط دخان حرق الرز و هباب عادم العربيات!
انا بركان شربوا علي حافتي شاي وشيشه ولعبوا طاوله .
لبسوا لي ماسكات مضروبه وباعوا بأسمي رماد مضروب يبقي اكيد انا فعلا بركان مضروب.

ثار البركان ثورته الأخيره ليعيد الى محيطه كل ما امتلأ به في خمس سنوات من مجاري وزباله وحيوانات ميته وناس ميته ونصابين وكراكيب وصرخ بصوت هادر قبل ان يغادر البلاد:

انا بركان انا مش سبوبه

رأس بلدي

شافت نفرتيتي خير الهم اجعله خير في منامها حلم غريب ,شوية نسوان بيجروا وراها وهيا بتجري منهم بيعايروها"ياخيبتك ياللي مخلفتيش راجل"وفضلت تجري منهم في حلمها لغايه مابعدت عنهم بس كانت خلاص تاهت ومش عارفه طريقها للقصر.
صحيت نفرتيتي(زوجة اخناتون فرعون مصر و أول من نادي بالتوحيد.وحماة توت عنخ امون فرعون مصر ايضا’) مفزوعه من الكابوس واستدعت كاهن القصر ليفسر لها رؤيتها.فسر الكاهن الرؤيه بانها شعور نفرتيتي بخيبة الأمل لأنها لم تنجب لأخناتون وليد ذكر يرث عرشه الذي اضطر اخناتون ان يورثه لصبي غير معروف النسب "توت عنخ امون"بعد أن زوجه بكبري بناته السته "عنخ اسن".و فسر توهانها عن القصر بأن مدينة اخت اتون التي اتخذها اخناتون بديلة للعاصمه طيبه وبني بها قصره ومقر حكمه ستزول وتحترق قريبا’.وقد تحقق كل ما فسر به الكاهن رؤية نفرتيتي.
ده كان التفسير موديل 1300قبل الميلاد , لو امتلك الكاهن بلوره سحريه وعلم ما سيحدث بعد 3000 سنه كان سيفسر حلم نفرتيتي كالتالي:
الكاهن:مجبتيش رجاله مولاتي نفرتيتي لأن أحفادك ستغيب عقولهم ويجروا ورا تمثال نحته اجدادهم لرأسك قبل عصرهم بألاف السنين وسرقه منهم عالم ألماني ليعرض في المتحف المصري ببرلين.احفادك سيظلوا 100 سنه يطلبوا استعادته و الألمان رافضين.
نفرتيتي:تمثال!!!!!!! وليه احفادي مينحتوش بداله 1000 تمثال!
الكاهن:احفادك بعد السنين لن يكون بهم طاقه لتشكيل العجين فمابالك بنحت الصخور وتشكيلها.
نفرتيتي:لماذا لا يستبدلون التمثال بأشياء اخري يحتاجها هؤلاء الألمان من الصناعات المصريه؟
الكاهن:مولاتي في زمنهم لن يكون للمصرين انتاج يحتاجه الألمان او غيرهم.
نفرتيتي:فليتركوا التمثال خارج البلاد ويكون وسيله لجذب الزوار من البلاد البعيده لزياره مصر,فلتكن رأسي هناك ولكن هل سرق نيل مصر ومعابدها وأهراماتها وحضارة الفراعنه الي هناك ايضا’!أوليس في أحفادي حكماء مفكرين يعلموهم ان حيازة الشيء ليست دائما’ شرط للاستفاده منه,و أن اسم الأنسان هو اول شيء يمتلكه ويستخدمه الأخرين ويظل الشخص هو اكبر المستفيدين من وجود اسم له.
الكاهن:مولاتي تقول البلوره ان مبدأ عدم ارتباط الحيازه بالمنفعه أثبته التاريخ و سيثبته المستقبل كثيرا’ ,فقناة السويس ستحفر في ارض مصر وينتفع الأوربيون بربحها لسنوات,وسيكتشف البترول تحت أرض العرب وتكون امريكا اكبر المنتفعين به.لكن يامولاتي لن يكون بين احفادك مفكرين, سيأخذ المفكرون منهم في الانقراض ومن يتبقي سيفقد صوته لأسباب غير واضحه في بلورة الزمن.
نفرتيتي:أذا’ نحن نفكر وهم لن يفكروا فلتنقشوا لهم علي جدران المعابد شرحا’ يعلمهم كيف يستفيدوا من تمثال راسي,اكتبوا لهم ان يطلبوا من المانيا:
1. أقامه مهرجان سنوي بألمانيا للتعريف بحضارة مصر والدعايه لزيارتها.
2. ان تضمن الحكومه الألمانيه حد ادني من السياح الألمان ليزورون مصر بدعم من دولتهم.
3. أن يعلم الألمان ابناء مصر بعض من اسرار حضارتهم الحديثه مقابل ماتعلموه من اسرار الحضاره المصريه القديمه.
4. منح درارسيه لطلاب اللأثار المصريين لدراسة اداره المتاحف وتنمية السياحه.
الكاهن:مولاتي قد بنينا ونقشنا وكتبنا لكن المستقبل يقول ان احفادك لا يقرأون.
نفرتيتي:ان لن يعلموا أن القيمه الحقيقيه للرأس تكون بما تحتويه من علم و افكار وليس بظاهرها او بتمثال لها فلتبشرهم باني ابدا لن اعود ولن تعود لهم رأس بلدي مصر.
ثم ذهب الكاهن دون ان يفسر الجزء الاخر من الرؤيه"الجزء الخاص بالتوهان" اصله مش محتاج تفسير.

فستانها

مازال سامر يتذوق طعم لقائه العاطفي الجميل المنتهي منذ دقائق ويسترجع تفاصيله ,

سامر:جميل هو فستانك

سها:

سامر:اعشق رسمته,تفصيلته,انحنائاته

سها:..................

سامر:رائع هدا اللون!لا استطيع ابعاد عيني عنه ولو للحظات ولا اري حوله,بجانبه او في محيطه اي شيء غيره!

سها:..................................

سامر:ظوله مناسب جدا,فهذا هو القدر الذي احب ان تظهره ملابس الفتاه لا اقل ولا اكثر و كذلك هي فتحاته

سها:...................

سامر: وهذه الاكسسوارات التي تزينه ذادته بهجه وبريق كما اعطت سبب وجيه لتنقلات عيني هنا وهناك بين جنباته

سها:..................

سامر:اتشوق الي اللقاء القادم الذي سأراك فيه انت او فستان اخر بمثل جمالك وروعتك.

ثم القي التحيه ومضي متجها الي سيارته

سها:................................................................................

لاتزال سها في مقعدها بالمقهي تحاول استيعاب ماحدث بينها وسامر في الدقائق الماضيه وتسترجعها ,

سامر:جميل هو فستانك

سها,تبتسم ابتسامه عريضه يملأها الفخر والغرور بأناقتها التي تنشغل بها دائما عن ما سواها.

سامر:اعشق رسمته,تفصيلته,انحنائاته

سها:هممممممم وياتري الكلام ده غزل ولا مجرد مجامله؟

سامر:رائع هدا اللون!لا استطيع ابعاد عيني عنه ولو للحظات ولا اري حوله,بجانبه او في محيطه اي شيء غيره!

سها:للدرجه دي حبيتني ونسيت عشاني كل الدنيا!!بالسرعه دي!!!

سامر:ظوله مناسب جدا,فهذا هو القدر الذي احب ان تظهره ملابس الفتاه لا اقل ولا اكثر و كذلك هي فتحاته

سها:بتحب ايه اكثر,جمال جسمي ولا جمال وشي؟

سامر: وهذه الاكسسوارات التي تزينه ذادته بهجه وبريق كما اعطت سبب وجيه لتنقلات عيني هنا وهناك بين جنباته

سها:(بدلع قوي)هو كل الكلام للفستان!انا حبداء احس بالغيره !

سامر:اتشوق الي اللقاء القادم الذي سأراك فيه ايها الفستان انت او فستان اخر بمثل جمالك وروعتك.

ثم القي التحيه ومضي متجها الي سيارته

سها:ساااامر!رايح فين؟؟؟؟؟انا بكلمك رد علي!!!!انت ايه مش شايفني قاعده معاك!

الخلاصه:

اذا لم تلتفت لجوهرك فلا تتوقع ان يلتفت اليه الاخرين او حتي ان ينتبهوا الي وجودك

لوسألتك انت مصري!!!

لو انت مصري لسه متخرج وبتحب وعاوز تخطب وتتجوز وكده

يبقي تسافر السعوديه تحوش شوية فلوس عشان الشقه والمهر.

لو انت مصري مسيحي وحاسس انك مش واخد حقك في مصر

يبقي تدورلك علي قريب في كندا او امريكا وتسافر علي هناك وتزبط جرين كارد وبعدين باسبورت وتعيش هناك.

لو انت مصري وشاطر فالدراسه وعندك طموح علمي جامد

يبقي تدور علي بعثة لاوروبا او امريكا تسافر تدرس وتعمل ابحاث محترمه هناك ويمكن ترجع.

لو انت مصرية حد ضحك عليكي واخلاقك بايظه واهلك مش سأليين عنك

يبقي تسافري دبي او البحرين تشتغلي سيكو سيكو.

لو انت مصري مسلم ولحيتك اللي مربيها عملالك مشكله في مصر

يبقي تسافر استراليا او كندا او نيوزلندا تمارس معتقداتك من غير قيود

لو انت مصري اهلك ساعدوك وبدأت حياتك و عملت اسره

يبقي تسافر انت ومراتك الامارات او أي بلد خليجي عشان متعدوش بأزامات ماليه وتعيشوا حياه انظف.

لو انت مصري من النوبه

يبقي تسافر السودان هناك اهلك وهناك فن شغل كتير وفلوس كتير.

لو انت مصري عندك بزنس وعاوزه يطير فوق بدل ميمشي يزحف في مصر

يبقي تسافر الأردن,العراق او ليبيا تعمل شغل هانك عشان هناك في سيوله كتير.

لو انت مصري تعليمك علي قدك فلاح ولا صنايعي وصحتك جامده

يبقي تسافر ليبيا او الاردن او لبنان تشتغل هناك باليوميه عامل نظافه ولا شيال ولا قهوجي او بناء.

لو انت مصري من كفر الدوار مهما كان تعليمك

يبقي تسافر امريكا تبيع هوت دوج في بروكلي في نيويورك زي ما كتير من بلدك بيعملوا.

لو انت مصري معاك مؤهل مطلوب ولغة معقوله

يبقي تقدم علي هجره لكندا او تعادل شهادتك وتشوف شغل و اقامه في امريكا او كندا.

لو انت مصري وجامد في شغلك ومتقدرش تسيب مصر عشان ابوك و امك هيموتوا لو سافرت

يبقي تشتغل في ملتي ناشيونال كبيره في وظيفه تسافر فيها رحلات قصيره بس كتيره.

لو انتي مصريه ومستنيه العدل

يبقي هيجيلك عريس عايش بره وعاوز يتجوز او عايش جوا وبعد متتجوزوا هتسافروا

الخلاصه عشان انا زهقت ان لو انت مصري يبقي هتسافر.

ولو انت مصري بجد هتزعل اوي لما تعرف ان المصري طول الزمان كان معروف عنه انه قليل السفر ومبيحبش يبعد عن ارضه,عشان الخير الي فيها كان رابطه بيها وعلموا الاستقرار.السفر مفيد وجميل و بيعلم الناس كتييييير لكن للأسف السفر لا يبني حضارات,لان ببساطه الناس هتتعلم بس هيعيشوا منتورين ولا هما هيتجمعوا ولا علمهم أو خبراتهم هتتجمع عشان تبني حضاره زي البناها المصرين القدماء لما كانوا متجمعين ومستقرين.

أرجو أن لا تنسي التفاصيل

في مقهي جندولا الإيطالي الغير مزدحم في مركز تجاري راقي جلس شادي في انتظار نهى.

كانت نهي هي عضوة لجنة التحكيم التي إمتحنته هو وباقي المتقدمين لتختار منهم 10 هم أصحاب أفضل السمات الشخصية ليكونوا في الدور النهائي لمسابقة "مستر ايجيبت" المسابقة التي تقدم شادي للإشتراك بها منذ شهور ثم إنسحب قبل إعلان نتيجة التصفيات بسبب مرض والده المفاجئ.وهناك تعرف علي نهي.

أشغل شادي وقت الإنتظار في تصفح الرسائل المتبادلة بينه وبين نهى و المسجلة في ذاكرة هاتفه المحمول:

·         كيف حال والدك.كم اسفني عدم اكمالك لمشوار المسابقة ، إعتني بنفسك جيداً.

كم كان حلو طعم هذه اللحظة عندما تلقي اول رسالة منها ، مشاعر متداخلة ، فرحة بأن نهي ذات الجمال والشخصية الجذابة تهتم لأمره و فخر لكون سماته قد جذبت إليه خبيرة علم النفس العالمة ببواطن الناس والقادرة بجدارة علي تقييم شخصياتهم بدقة.

·         عديني أن تمنحيني فرصة من وقتك يوما ما لتخبريني بتحليلك الدقيق لشخصيتي وأريد العيوب قبل المميزات ، أرجو أن تحفظي في ذاكرتك كل إنطباعاتك عني.أرجوكي إحفظيها جيداً.

كان شادي فخوراً بنفسه متأكد من أن نهي ستكتب الأشعارعن شخصيتة.هو لم يصل للنهائيات لكن خبيرة علم النفس قد أعجبت به بدليل إهتمامها و إرسالها الرسائل إليه و سيكون في مدحها له عزاء كافي عن الفرصة الضائعة. والأهم من هذا هو حصوله علي وعد باللقاء. أرجوكي تذكري كل شيء.

·         كم إستمتعت اليوم بمكالمتك لي أرجوا أن تكون بداية لصداقة طويلة.ملحوظة:مازلت أصر علي أن تتذكري كل شئ عن شخصيتي.

·         يسرني أن نكون أصدقاء ، وإطمئن أني أتذكر جيداً تقييمي وتقييم لجنة التحكيم لشخصيتك.

·         أرجوكي لا تنسي أي حرف من تفاصيل التقييم.

·         أرجوكي لا تنسي أي حرف من تفاصيل التقييم.

·         أرجوكي لا تنسي أي حرف من تفاصيل التقييم.

·         آسفة لتأخير الرد كنت مشغولة جدا لا تقلق فأنا أتذكر جيدا كل شيء عن أصدقائي.

·         هل يمكننا ان نلتقي غداً لتنقلي لي ما كان تقييمك وتقييم اللجنة لشخصيتي ومواطن قوتها وضعفها؟

·         بالطبع.موعدنا غدا الساعة 8 في مقهي جندولا.

لم يكن شادي يهتم بأمر التقييم ولا تفاصيله،  فقط اراد ان يستغل عبارات المدح التي يتوقع ان تقولها عنه وعن شخصيته ،اراد ان يكون اعجابها به هو مقدمة تعطيه الثقة ليحدثها عن انبهارة بها وعن رغبته في أن لا يبتعدا حتي يفرق الموت بينهما.

وهاهو يومه الموعود قد أتي وأيضاً أتت نهي  وقد لمحها شادي فوضع هاتفه ثم قام لإستقبالها.

بعد دقائق قليلة من تبادل التحيات والأسئلة المعتادة عن الأحوال :

• نهي:يدهشني اصرارك علي معرفة تقييم اللجنه لك بتفاصيله وانت قد إنسحبت من المسابقة والمسابقة قد انتهت فلا اكاد اري اي فائدة من اخبارك!!!
• شادي (متظاهرا بالموضوعية الشديدة):أريد فقط أن أعرف ما نقاط قوتي فأنميها وما نقاط ضعفي فأتخلص منها.و أرجوكي لا تشعري بأي حرج في إخباري أين ضعفي.
• نهي : اما نقاط ضعفك فقد رأينا أنا وباقي إعضاء اللجنة إنك..........و...............و................و...........و.............و..........و........وأخري غير مهمة
• نهي: وكانت نقاط قوتك :

وقبل ان تذكر نقاط القوة كان شادي قد عدل جلسته المتقهقرة إلي اخري متحفزة و رسمت ملامحه إبتسامة ثقة استعداد لما يشتاق ان يسمعه

       نهي تعود للحديث: كانت نقطة قوتك هي أنك ....  .

ثم ساد الصمت ثوان قليله طويلة، بعدها شكر شادي نهي كثيرا علي وقتها ومعروفها بإخباره كل التفاصيل وقاما بعد الصفاح والتحية الروتينية.

وما ان افترقا حتي جاء جرس هاتف شادي يخبره باستلامه  رساله :

•  "كما وعدتك لقد تذكرت التفاصيل"

وكتب شادي الرد:

• "ارجو ان تنسي كل التفاصيل"

وكانت آخر رسالة بينهما.

اعترافات ليليه

عبث بايامه طولا وعرضا ولم ينتبه ان الأيام هي من كانت تعبث به.ظن انه أثر فيها غيرها ولونها ولم يلحظ ان ايامه هي التي لونت بشرته بالسمره ,اسنانه بالصفار والمتبقي من شعره بالبياض.كم

استمتع وتعجب وتشوق احيانا وهو يتابع الدنيا ,تغيراتها وانقلابها ولم يفطن لأن الحياه هي من كانت تشاهد عرض مسلي مليء بالأحداث بطله كان هو دون قراره ولا حتي علمه.

شعر سامي (61 سنه) انه يقترب من النهايه,صعوبه في التنفس,ارتخاء في عضلاته وتذكر تحذيرات طبيبه من المجهود الزائد خاصة في الأستعدادات لزواج صغري بناته مي الذي تم علي اكمل وجه منذ اسبوع وهي الأن في باريس تقضي شهر العسل ليخلوا بيت سامي العامر الأ منه وزوجته بثينه التي كانت منهمكه تغسل بعنايه اللأطباق التي اتي عليها سامي في عشاءه منذ قليل. ما اجمل طبيخك يا بثينه.

نادي سامي بثينه لتأتي هادئه كعادتها:

سامي: اشعر انها النهايه,ارجو ان تسامحيني يا زوجتي العزيزه فقد كنتي دائمة الثقه بي ولم اصن ثقتك,نعم لم تكن سهراتي في العمل كما كنت اخبرك ولم تكن رحلاتي بريئه مع رفاقي بل كانت مع امراه اخري وأخري واخري.اسف اني استغللت طيبتك وبراعتي في التمثيل فكانت لي علاقات مع اعز صديقاتك لم تشعري بها وكم تندرت معهم عن سذاجتك.انا اتالم الأن و اندم علي كل لحظه استمعت فيها بقدرتي علي خداعك واستغلال انشغالك الدائم في العنايه بابنتينا منذ تزوجنا.اعلم ان أعترافي يصدمك في من ظننتي طول حياتك انه نقي ,شفاف غير قادر علي ايذاء أحد ,مثلك تماما.كم اكره الان ذكائي الذي مكنني من خداع اطيب انسان عرفته بالحياه.

وسكت سامي الي الأبد وفارقته الروح ولم يترك لبثينه فرصه لتعترف له انها هي من وضعت له السم بيدها في وجبة عشائه الأخير.

"يري المبصر بعينه ويري البصير بعيون الأخرين ايضا

نظره بمبي للمجلس الموقر

احنا كده يا مصرين.مش عاجبنا العجب,ملولين,مملين,لائمين ,متشائمين ودايما باصين علي نص الكوبايه الفاضي وساعات كتيره بنكسر الكوبايه او نرميها من الشباك.من الاخر مش عاجبنا العجب.وبماان التجارب العلميه الحديثه كل يوم بتثبت ان حلاوة الحياه تعتمد علي  رؤية الناس لها حسب المعادله:

الحياه x  الناس =ا لحلاوه x  رؤيه

بعمليه حسابيه بسيطه يعملها  اي عيل في ابتدائي

الحلاوه = رؤيه * الناس \ الحياه   

يعني عشان نتبسط و نزيد الحلاوه في عيشتنا يبقي لازم نغير حاجه من تلاته:

• الناس:

ومش هنعرف نبدل الشعب المصري مع حد لان ماحدش هيرضا ياخده لأنه اتشم في سوق الشعوب وفضايحه بقت بجلاجل

• الحياه:

ودي بصراحه برضو تقيله علينا قوي اننا نغيرها.ان كنا مش عارفين نغيير كشوف الأنتخابات من 60 سنه يبقي معقوله هنقدر نغير الحياه!!

• الرؤيه : 

  ايوه! مافيش قدامنا غير دي,بسيطه ونقدر عليها وبتطلع من جوانا ماحدش يقدر يفرضها علينا

ولدلك ولكي استمتع بالحياه قررت ان اغير رؤيتي للأحداث وادعوكم للتغير ايضا وان نكون اكثر تفائل ونبص للنص المليان شويه يا عالم يا كئيبه.

واول الأحداث اللي محتاجه نبصلها نظره ايجابيه هي نتائج انتخابات مجلس الشعب,اللي بعد مالبست نظارتي البمبي الجديده لقيت اننا كلنا لازم نكون فرحانين بيها وشايفين جوانبها الايجابيه الكتيره اللي منها علي سبيل المثال لا الحصر:

• اصبح مجلس الشعب مجرد مقر او فرع من فروع الحزب الوطني ودي بشري ساره لأخوانا منظمي والمشاركين في الوقفات الاحتجاجيه ,الان يا اخي المحتج الكريم انت مش محتاخ تيجي من اخر الدنيا لغاية شارع القصر العيني عشان تقف تحتج علي رصيف المجلس, انت ممكن تحتج قدام فرع للحزب الوطني في قريتك اودايرتك وتوفر مصاريف وعناء المواصلات ومش هاتحس بأي فرق لان الممثلين في المجلس همه همه الممثلين في الحزب ولانهم هنا او هنا هيسيبوك بكل حريه تخبط دماغك في الحيطه تبقي الحيطه القريبه اولي و اوفر واكيد هتكون احن علي دماغك
• ستقل بصوره كبيره او تنعدم طلبات الاحاطه للحكومه والساده الوزراء,الله ماهو مش معقوله يعني الناس هيكونوا زملاء وحبايب في الحزب ومجلس الوزراء ومجلس الشعب ومجالس ادارات شركاتهم ومجالس انس اخري ويقطعوا هدوم بعض ويستجوبوا بعض وبالتالي الساده الوزراء هيكون عندهم وقت اكتر لممارسة اعمال ومهام الوزاره.ومش هيكون في طلبات احاطه لاي وزير الا من نوع "انت مال لونك مخطوف اليومين دول,لازم تاخد بالك من صحتك شويه وبلاش تجهد نفسك زياده في الوزاره و" كول كويس واكلنا معاك"
• تجانس اعضاء المجلس الكبير سيولد مناخ كله حب ورومانسيه داخل المجلس وفي ده فرصه لتجار الزهور والهدايا انهم يستثمروا في محلات علي سور المجلس الموقر ليتبادل الاعضاء الورود في الجلسات الساخنه والهدايا في مناسباتهم السعيده "الكتيره".
• كل ممثل من ممثلين الشعب هيكون حافظ دوره الي هيأديه في كل جلسه ومش هيكون في اي مفاجئات وبالتالي لن تتحتاج كاميرات التليفزيون للتصوير الحي والنقل المباشر بمشاكله الكتيره ويمكن تصوير الجلسات كلها مره واحده في بداية الموسم واداعتها علي 30 حلقه في شهررمضان علي قناة الدراما.
• زيادة تمثيل المرأه في المجلس وحصولها علي 10% من المقاعد وزي ما انتم عارفين مجلس الشعب ده هو بيت الامه وطبعا كلنا منستغناش عن نفس الست في البيت ولمساتها اللي هتدي رونق للمجلس.بالاضافه لأننا هنلاقي طرق جديده لصرف ميزانية العلاج علي نفقة الدوله اللي مكناش عارفين نوديها فين وده لان العضوات هيستخدموها في حاجات جديده بالأضافه لاللي كان بيستخدمها فيها الأعضاء وهنبتدي نسمع عن عضوه ربنا نتعها بالسلامه و ولدت في امريكا علي نفقة الدوله وعضوات عملوا عمليات تكبير وتصغير وملأ وتلميع (شفايفهم طبعا) علي نفقة الدوله
• واخيرا وليس اخرا ان لو مجلس الشعب اتحرق زي ماحصل من كام سنه ماحدش هيزعل لأن الشعب مبقالوش حاجه في المجلس.

 مش عارف اكون ايجابي اكتر من كده بس ادعوكم كلكم الشايف ايجابيات تانيه يقولها واللي مش شايف حاجه يقوللي اشتري له نظاره بمبى زي بتاعتي



يابوعزيزي كلنا محترقون

اعتادت امتنا عبر التاريخ ان تلعب الحرائق دورالعلامات علي خفوت حضارات وانهيار عصور , كما كان احتراق المباني والأثار مثل أحتراق مبني دارالاوبراالمصريه او احتراق الثقافه والكتب مثل احتراق مكتبة الأسكندريه.لكن يبدو ان عصرنا الحالي لا تحمل الامه اي شيء ليحترق .فلم يبقي شيء ليحترق الا الأنسان

 شهد امس وفاه محمد البوعزيزي الشاب التونسي المنتحر حرقا امام مبني حكومي في مدينة سيدي بوزيد ليسجل اعتراضه بعد ان يأس من الحصول علي وظيفه وحتي من ان يبيع الخضراوات في شوارع تونس بأختصار يأس من ان يشعر بوجوده كعضو مؤثر ومنتج في مجتمعه بأي صوره بعد سنوات من اكماله مشوار التعليم الجامعي بنجاح,فعندما ييأس انسان تماما من ان يشعر الاخرين انه موجود سيحاول ويكتفي بأن يشعرهم انه كان موجود.

احتراق اخر نفس الأسبوع  كان من نصيب 23 مصري ومصريه في كنيسة القديسين بالأسكندريه اثر تفجير ارهابي اثناء احتفالهم والمصرين والعالم بالعام الميلادي الجديد.

اما الاحتراق الثالث في نفس التوقيت فكان لمنفد العمليه الارهابيه مجهول الشخصيه والاسم حتي الان لكن من المؤكد ان صورته مرسومه في خيالنا جميعا طبقا لما تعلمناه عن الجماعات المتطرفه,فهو غالبا شاب متوسط التعليم من بلد عربي اسلامي استغل غيره حماسه المفرط ومستواه الثقافي المحدود واحباطاته ويأسه من مجتمعه في ايهامه بأن قتل الاخرين هو سبيله للجنه لينعم الي مالا نهايه بكل مالم ينعم به ولم يطمع او يطمح له في حياته

احترق البوعزيزي والضحايا والارهابي في نفس الفتره ولكنهم اختلفوا.

فالبوعزيزي مات مبدعا ,علم الكثير من اليائسين العرب طريقه جديده للتعبير عن سخطهم وقبل ان يموت راي من بداء في اتباع سنته.

 واختلف الضحايا في انهم لم يقرروا الموت و الأحتراق كما البوعزيزي و الارهابي وانهم كانوا مسالمين راضين وربما ظنوا كما الكثيرين منا ان في الصمت والرضا والتعايش مع اي ظلم نجاة لهم من كل سوء.

واختلف الارهابي في انه اراد مع سبق الأصرار ان يجعل الدنيا بعد احتراقه اسواء مما عاصرها وان يضيف اليها من الأحزان والفتن قدر ما يستطيع.

اشترك الثلاثه في عروبتهم وفي النار التي تركوها في قلوبنا,نعم والله لقد احترقت مع البوعزيزي عندما حسبت كم من الزمن تحتاج اعاده زرع الحياه في امه قد وصل الاحباط في قلوب شبابها الي درجة ان يهربون من واقعهم الي النار بلا تردد!!

والله لقد احترقت مع ضحايا كنيسة القديسين وانا اري دمائهم تلون الصفحه الاولي من اي عام جديد صفحة الأمال باللون الأسود.وتكتب لنا باللون الاحمر انتظروا الحلقات القادمه من مسلسل سلبيتكم

ولقد احترقت وأنا افكر في الارهابي وما كان يحمله من كراهيه ناسفه جعلته يختار ان يتفتت ويحترق اولا علي ان يحترق ضحاياه بعده,وان كان لن يري اثار فعلته ويفرح بانتصاره ولكنه لم يهتم في سبيل ان يكون الانفجار قويا والأحتراق شديد

المعترض الرافض احترق,المسالم الراضي احترق والثائر المتطرف أحترق!ونحن معهم.....يا البوعزيزي كلنا محترقون

انتم السابقون ونحن اللاحقون