نظره بمبي للمجلس الموقر

احنا كده يا مصرين.مش عاجبنا العجب,ملولين,مملين,لائمين ,متشائمين ودايما باصين علي نص الكوبايه الفاضي وساعات كتيره بنكسر الكوبايه او نرميها من الشباك.من الاخر مش عاجبنا العجب.وبماان التجارب العلميه الحديثه كل يوم بتثبت ان حلاوة الحياه تعتمد علي  رؤية الناس لها حسب المعادله:

الحياه x  الناس =ا لحلاوه x  رؤيه

بعمليه حسابيه بسيطه يعملها  اي عيل في ابتدائي

الحلاوه = رؤيه * الناس \ الحياه   

يعني عشان نتبسط و نزيد الحلاوه في عيشتنا يبقي لازم نغير حاجه من تلاته:

• الناس:

ومش هنعرف نبدل الشعب المصري مع حد لان ماحدش هيرضا ياخده لأنه اتشم في سوق الشعوب وفضايحه بقت بجلاجل

• الحياه:

ودي بصراحه برضو تقيله علينا قوي اننا نغيرها.ان كنا مش عارفين نغيير كشوف الأنتخابات من 60 سنه يبقي معقوله هنقدر نغير الحياه!!

• الرؤيه : 

  ايوه! مافيش قدامنا غير دي,بسيطه ونقدر عليها وبتطلع من جوانا ماحدش يقدر يفرضها علينا

ولدلك ولكي استمتع بالحياه قررت ان اغير رؤيتي للأحداث وادعوكم للتغير ايضا وان نكون اكثر تفائل ونبص للنص المليان شويه يا عالم يا كئيبه.

واول الأحداث اللي محتاجه نبصلها نظره ايجابيه هي نتائج انتخابات مجلس الشعب,اللي بعد مالبست نظارتي البمبي الجديده لقيت اننا كلنا لازم نكون فرحانين بيها وشايفين جوانبها الايجابيه الكتيره اللي منها علي سبيل المثال لا الحصر:

• اصبح مجلس الشعب مجرد مقر او فرع من فروع الحزب الوطني ودي بشري ساره لأخوانا منظمي والمشاركين في الوقفات الاحتجاجيه ,الان يا اخي المحتج الكريم انت مش محتاخ تيجي من اخر الدنيا لغاية شارع القصر العيني عشان تقف تحتج علي رصيف المجلس, انت ممكن تحتج قدام فرع للحزب الوطني في قريتك اودايرتك وتوفر مصاريف وعناء المواصلات ومش هاتحس بأي فرق لان الممثلين في المجلس همه همه الممثلين في الحزب ولانهم هنا او هنا هيسيبوك بكل حريه تخبط دماغك في الحيطه تبقي الحيطه القريبه اولي و اوفر واكيد هتكون احن علي دماغك
• ستقل بصوره كبيره او تنعدم طلبات الاحاطه للحكومه والساده الوزراء,الله ماهو مش معقوله يعني الناس هيكونوا زملاء وحبايب في الحزب ومجلس الوزراء ومجلس الشعب ومجالس ادارات شركاتهم ومجالس انس اخري ويقطعوا هدوم بعض ويستجوبوا بعض وبالتالي الساده الوزراء هيكون عندهم وقت اكتر لممارسة اعمال ومهام الوزاره.ومش هيكون في طلبات احاطه لاي وزير الا من نوع "انت مال لونك مخطوف اليومين دول,لازم تاخد بالك من صحتك شويه وبلاش تجهد نفسك زياده في الوزاره و" كول كويس واكلنا معاك"
• تجانس اعضاء المجلس الكبير سيولد مناخ كله حب ورومانسيه داخل المجلس وفي ده فرصه لتجار الزهور والهدايا انهم يستثمروا في محلات علي سور المجلس الموقر ليتبادل الاعضاء الورود في الجلسات الساخنه والهدايا في مناسباتهم السعيده "الكتيره".
• كل ممثل من ممثلين الشعب هيكون حافظ دوره الي هيأديه في كل جلسه ومش هيكون في اي مفاجئات وبالتالي لن تتحتاج كاميرات التليفزيون للتصوير الحي والنقل المباشر بمشاكله الكتيره ويمكن تصوير الجلسات كلها مره واحده في بداية الموسم واداعتها علي 30 حلقه في شهررمضان علي قناة الدراما.
• زيادة تمثيل المرأه في المجلس وحصولها علي 10% من المقاعد وزي ما انتم عارفين مجلس الشعب ده هو بيت الامه وطبعا كلنا منستغناش عن نفس الست في البيت ولمساتها اللي هتدي رونق للمجلس.بالاضافه لأننا هنلاقي طرق جديده لصرف ميزانية العلاج علي نفقة الدوله اللي مكناش عارفين نوديها فين وده لان العضوات هيستخدموها في حاجات جديده بالأضافه لاللي كان بيستخدمها فيها الأعضاء وهنبتدي نسمع عن عضوه ربنا نتعها بالسلامه و ولدت في امريكا علي نفقة الدوله وعضوات عملوا عمليات تكبير وتصغير وملأ وتلميع (شفايفهم طبعا) علي نفقة الدوله
• واخيرا وليس اخرا ان لو مجلس الشعب اتحرق زي ماحصل من كام سنه ماحدش هيزعل لأن الشعب مبقالوش حاجه في المجلس.

 مش عارف اكون ايجابي اكتر من كده بس ادعوكم كلكم الشايف ايجابيات تانيه يقولها واللي مش شايف حاجه يقوللي اشتري له نظاره بمبى زي بتاعتي